У Фэйсбуку ёсьць шмат камэнтароў, дзе прыстойныя людзі паўтараюць азначэньні і лаянку дрэннай прапаганды, нізкімі словамі зьневажаюць прэзыдэнта Трампа і вераць прапагандысцкім ацэнкам. Гэта характэрна для людзей, якія ня з вобласьці палітыкі, якія ня бачылі і не перажывалі татальных прапагандысцка-агрэсіўных інфармацыйных атак глабалісцкага кшталту, якія агаломшаны імі і не разумеюць іх.
Паважаючы такіх спадарынь і спадароў, сказаў бы, што тут нельга ўзбуджацца. Гэта лішняе. Усё будзе шумець яшчэ доўга, аж да перамен. Вашыя пачуцьці і непрыхільныя словы на працэсы не пауплываюць, але рызыкуеце сапсаваць адносіны зь людзьмі. Лепш заставацца ветлівым, разумным і спакойным.
Самае дрэннае, што атрымліваецца у выніку даверу да татальнай прапаганды і ў выніку пачуцьцёвага ўзбуджэньня, гэта тое, што людзі пачынаюць існаваць ва ўяўным сьвеце, які ім здаецца рэальнасьцю. На самай справе, сьвет падзеі, працэсы -- іншыя. Мінае час, і рэальнасьць становіцца рэальнасьцю. І тады шмат хто хацеў бы захаваць твар.
Як бы не складваліся палітычныя дачыненьні, як бы не круціла дыпламатыя і прпаганда, наш компас справядлівасьці павінен быць неадступны -- усімі сіламі і ўсімі перакананьнямі падтрымліваць змагарную Украіну. Праўда за ўкраінцамі.
І наступнае, важнае для нас. Ва ўсім, што адбываецца цяпер ў сьвеце (а гэта перамена сьвету і зьмяняе яго Амэрыка) для беларускага палітыка (а ў прынцыпе -- для кожнага Беларуса), ёсьць адзіны клопат, адна першасная каштоўнасьць і адно найважнейшае пытаньне, якое трэба вырашыць і зразумець. Менавіта: што будзе зь Беларусяй, з нашай дзяржавай і незалежнасьцю. Не спадзяваймася на тых, каму мы абыякавы, хто нам варожы і хто хоча нас скарыстаць. Але добра рабіць так, каб нас маглі падтрымаць тыя, хто спрыяльны свабодзе, хто можа ўплываць на падзеі.
27.03. 2025.
Зянон Пазьняк